په سړو سیمو او ولایتونو کې د ښوونځیو کلنۍ ازموینې پیل شوې
د پوهنې وزارت د تدریسي لایحې له مخې، نن د لړم/عقرب میاشتې په ۲۵مه د هېواد په سړو سیمو او ولایتونو کې د رسمي او خصوصي ښوونځیو د لومړنۍ/ابتدايه دورې کلنۍ ازموینې پیل شوې.
ټاکل شوې ده، چې د پورته ذکر شوې دورې د ازموینو تر پای وروسته، د روان لمریز کال د لیندۍ/قوس میاشتې له لومړۍ نېټې څخه د همدغو ولایتونو د منځنۍ او ثانوي دورو ازموینې هم پیل شي، چې ۱۵ ورځې به دوام وکړي.
د سړو سیمو او ولایتونو د پوهنې ریاستونو د راپورونو له مخې، د ازموینو په لومړۍ ورځ پوهنې رئیسانو، آمرینو، د ولسوالیو مسئولینو، علماءکرامو او په ځینو ولایتونو کې د محلي ادارو یو شمېر چارواکو او منورو شخصیتونو د ازموینو بهیر څخه څارنه او کتنه کړې ده.
مسئولینو د کتنې پر مهال د ازموینو وضعیت، څرنګوالی او د ازموینو اخیستلو طریقې وڅېړلې او د ښوونځیو مسئولین او ښوونکي یې د عدالت او روڼتیا په مراعاتولو، او زدهکوونکي یې د ازموینو د اصولو او نظم په پوره رعایت کولو مخاطب کړل.
هغوی له زدهکوونکو وغوښتل چې درسونه دې یوازې د ازموینې او د ښې نمرې لپاره نه، بلکې د علم ترلاسه کولو، پوهې زیاتولو، روښانه راتلونکي او د خپل ولس او وطن د خدمت په موخه زده کړئ.
