په فاریاب کې د افغانکوټ د نجونو د ښوونځي نوې ودانۍ پرانیستل شوه
د پوهنې وزارت، فاریاب : د فاریاب ولایت د مرکز اړوند د افغانکوټ د نجونو د ښوونځي نوې ودانۍ د نوموړي ولایت د والي ډاکتر نقیب الله فایق، د پوهنې رییس الحاج عزت الله خوشبین لخوا په داسي حال کې چې د دولتي ادارو یو شمیر مسوولینو، په ولسي جرګه کې د فاریاب د خلکو استازو، قومي مشرانو او ښوونکو ګډون درلود د پټی په پریکولو سره پرانیستل شوه.
په هغه غونډه کې چې په همدې موخه د یاد ښوونځي په انګړ کې جوړه شوي وه د فاریاب والي ډاکتر نقیب الله فایق په پارلمان کې د فاریاب د خلکو استازي الحاج محمد هاشم، او همدارنګه د ناروې د شاهي دولت د هلو ځلو له امله مننه او قدرداني وکړه او د ښوونځي د اهمیت او د تعلیم د ارزښت په اړه یې تفصیلي خبرې وکړې.
یاده ودانۍ په پاخه او اساسي ډول په دریو پوړنو کې د ناروې شاهي دولت په مالي مرسته د ۷۷ میلیونو او ۵۰۳ زره او ۶۳۹ افغانیو په مجموعي لګښت جوړه شوې، چې ۴۲ درسي ټولګي، ۶ اداري خونې، ۱۰ غرفې عصري تشنابونه، د زده کوونکو لپاره ۷۵۶ پايي میز او څوکۍ شامل دي.
