په لوګر ولایت کې یو باب ښوونځی پرانیستل شو
د لوګر ولایت محمدآغې ولسوالۍ اړوند د کتب خېلو عالي لېسې د ودانۍ د بیارغونې چارې بشپړې او ګټې اخیستنې ته وسپارل شوه.
د یادې لېسې د پرانیستې په مراسمو کې، د دغه ولایت د پوهنې ریاست پر مسئولینو سربېره علماوو او قومي مخورو هم حضور درلود.
د لوګر ولايت پوهنې رياست مسئولين وايي: د ياد ښوونځي په بيارغونه کې د دروازې او کړکیو نوي کول، د احاطوي دېوال جوړول، د ودانۍ رنګول، د درسي خونو، مېزونو او څوکيو رغول شامل دي.
د مسئولینو د معلوماتو له مخې: پر يادې پروژې څه باندې ۱۲۰ زره افغانۍ لګښت راغلى، چې د محمد آغې ولسوالۍ د پوهنې دوستو خلکو له خوا ورکړل شوى دى.
د يادونې وړ ده، چې د دغه ښوونځي په رغولو سره د ۱۰۰۰ تنه زده کوونکو لپاره د زده کړې مناسب چاپېریال برابر شو.
د لوګر د پوهنې رياست مشرتابه د دغه بااحساسه خلکو له مالي ملاتړ څخه د مننې ترڅنګ، له هغوى وغوښتل، تر څو خپل ماشومان د دیني او عصري زده کړو په موخه، مدارسو او ښوونځيو ته واستوي.
