په میدان وردګ ولایت کې د ښوونځیو د ښوونکو او مدیرانو مسلکي وړتیا لوړولو لپاره «د عملي درسونو څارنې پروګرام »دوام لري
د "کوچنګ" پروګرام، چې په ټولګیو کې د ښوونکو د تدریس څارنه او مشاهده کول پکې شامل دي، د میدان وردګ ولایت په ناصریان او حضرت علي ښوونځيو کې "د مدیرانو، سرښوونکو او ښوونکو لپاره «د ساعتوار، کلني او مسلکي پراختیا پلانونو چمتو کولو او تنظیمولو" تر سرلیک لاندې ترسره شو.
د میدان وردګ ولایت پوهنې رئیس محترم مولوي محمد عثمان حریت د پورته پروګرام د موخې په تړاو وویل:
یاد پروګرامونه د مدیرانو او ښوونکو د مسلکي وړتیاوو لوړولو، د تدریسي مېتودونو د روشونو ترویج، د تدریسي او اداري ننګونو حل او همدارنګه د ښوونکو لپاره د ساعتوار، کلني او مسلکي پراختیا پلانونو چمتو کولو او تنظیم په موخه طرحه او پلي شوي دي."
نوموړي زیاته کړه چې په ښوونځیو کې رامنځته شوي تعلیمي فرصتونه د تجربو تبادلې، د ګډو ستونزو حل کولو او د زدهکړې کیفیت لاښه کولو لپاره چمتو شوي دي.
د هغه په وینا، په پلان جوړونې کې د نویو مېتودونو کارول او د ښوونکو مسلکي ودې ته پاملرنه د میدان وردګ ولایت په ښوونځیو کې د زدهکړې کیفیت لاښه والي په لور یو مهم ګام دی.
