په نوي ۱۴۰۳ ښوونیز کال کې د دایکندي ولایت ښوونځیو ته زیات شمېر ماشومان شامل شوي دي
د دایکندي ولایت پوهنې ریاست په یوه خبرپاڼه کې د یاد ولایت په ښوونځیو کې د نویو زده کوونکو د زیاتوالي خبر ورکړی او ویلي یې دي، چې په روان ښوونیز کال کې د دغه ولایت په ښوونځیو کې ۱۸ زره ماشومان شامل شوي دي.
د ياد ولايت پوهنې رئيس قاري عنايت الله سهار د پوهنې په برخه کې د زده کوونکو د زياتوالي لاملونه، خپلو ماشومانو ته د زده کړو په برخه کې د کورنيو هڅونه او لېوالتيا او په هېواد کې د پوهنې وزارت له لوري د ديني او عصري علومو په برخه کې د آسانتياوو برابرول وبلل.
نوموړي د یاد ولایت ولسونو ته ډاډ ورکړ، چې د پوهنې وزارت مشرتابه د افغانستان.ا.ا. عالي رهبرۍ د لارښوونې او تګلارې له مخې، د هېواد ټولو بچیانو لپاره د امکان تر حده د متوازنې ښوونې او روزنې آسانتیاوې برابرې کړي دي.
د پوهنې رئیس زیاته کړه، چې د د ایکنډي ولایت په ټولو برخو کې د دیني او عصري زده کړو د بنسټونو د جوړولو او فعالولو لپاره شپه ورځ هلې ځلې کوي.
