پکتیا ولایت کې څه د پاسه ۲ مېلیونه افغانیو په لګښت د یو ښوونځي د ودانۍ بنسټ ډبره کېښودل شوه
د پکتیا ولایت زرمت ولسوالۍ اړوند کلاګو اتفاق عالي لېسې د نوې ودانۍ بنسټ ډبره، د عامو خلکو او ملي سوداګرو له خوا د ۲.۳ مېلیونه افغانیو په لګښت د پوهنې مسئولینو په حضور کې کېښودل شوه.
د ښوونځي دغه ودانۍ به له ټولو اړینو ملحقاتو سره ۱۰ درسي خونې او ۲ اداري خونې ولري او له پلان سره سم به په ۲.۵ جرېبه ځمکه کې ورغول شي.
د پوهنې وزارت مشرتابه د پوهنیز نظام سره د هېوادوالو په ځانګړې توګه د پکتیا ولایت علم پروره خلکو او ملي سوداګرو له مادي او معنوي مرستو څخه قدرداني کوي.
