پکتیکا ولایت کې د ۶۰ مېلیونه افغانیو په لګښت د ۱۰ بابه مدارسو او ښوونځیو نوې ودانۍ پرانیستل شوې
د پکتیکا ولایت په فرضي ډیورنډ کرښې پورې اړوندو ولسوالیو کې، د ۹ بابه ښوونځیو او یوې دیني مدرسې لپاره نوې ودانۍ جوړې او په رسمي ډول د یو لړ مراسمو په ترڅ کې ګټې اخیستنې ته وسپارل شوې.
د پوهنې چارواکو سربېره، والي، دیني علماءکرامو او د سیمه ییزو ادارو مسئولینو هم د پورته ذکر شویو پروژو د پرانیستې په مراسمو کې ګډون درلود.
د دغو پروژو تطبیق لپاره، د اسلامي ا.مارت مشرتابه عالي مقام لخوا د ۸۰ مېلیونه افغانیو بودیجه منظوره شوې وه، چې له هغې څخه ۶۰ مېلیونه افغانۍ په یادو پروژو لګول شوې دي.
د پکتیکا والي محترم مولوي عبدالخالق عابد په خپله وینا کې وویل چې د دغو ودانیو پرانیستنه، د پوهنې په وده او ښوونیز کیفیت په پیاوړتیا کې مهم رول لوبوي.
د پوهنې رئیس محترم مولوي عبدالوکیل خالد هم زیاته کړه، چې د یادو ودانیو په بشپړېدو سره، زرګونه زدهکوونکي د مناسب تعلیمي چاپېریال څخه برخمن شول.
د یادونې وړ ده چې، په هره ودانۍ کې ۸ درسي خونې، احاطوي دېوال، د پاکو اوبو سیسټم او نور اړین لوازم شامل دي.
