له مرکز او ولایتونو څخه د پوهنې لنډ خبرونه
د کابل ښار د پوهنې ریاست
د کابل ښار د پوهنې ریس مولوي احسان الله خطاب د ښوونکو د مسلکي ودې له ریس مولوي محمد ابراهیم عمري سره په کتنه کې په دې اداره کې د نویو برنامو د عملي کولو او د تعلیمي څارنې د ریاست د کړنو پر څرنګوالي او په دې برخه کې پر شته ننګونو خبرې وکړې.
ښاغلي خطاب د هر ډول همکاریو د ژمنې په ترڅ کې د ښوونکو د مسلکي ودې له رئیس څخه وغوښتل چې د دغه پروګرام په عملي کولو کې له ډېر دقت څخه کار واخلي، ترڅو د دې ریاست کارکوونکي زیانمن نه شي.
کابل
د کابل ولایت د چهاراسیاب ولسوالۍ د لالندر او الیاس خیلو کلیو مشرانو او قومي مخورو د دې ولسوالۍ د پوهنې له آمر مولوي شکرالله حیدر سره په لیدنه کې د پوهنې د ښه والي په برخه کې خپلې ستونزې او وړاندیزونه له هغه سره شریک کړل او د حل غوښتنه یې وکړه. چې ښاغلي حیدر هم له دوی سره د هر ډول مرستو ژمنه وکړه.
د یو بل خبر له مخې
د OCCD موسسې د چهاراسیاب ولسوالۍ د پوهنې آمریت په مرسته د یادې ولسوالۍ د لکو کلا او خواجه کلا په سیمو کې د سیمه ییزو زده کړو دوه ټولګي جوړ کړل.
له همدې ولایت څخه د نورو خبرونو له مخې
د OCCD موسسې مسوولینو او د کابل ولایت د پغمان ولسوالۍ د پوهنې آمریت په یوه کاري او مشورتي ناسته کې د دې ولسوالۍ په لرو پرتو سیمو کې د ۱۴۰۲ کال لپاره د سیمه ییزو او چټکو زده کړو د ۲۰ بېلابېلو ټولګیو د جوړولو په باب سلا مشورې او پرېکړې وکړې.
فراه
ابرار موسسې د فراه د پوهنې ریاست په مرسته د دغه ولایت په مرکز کې د ۴۷ نارینه او ښځینه ښوونځیو ۳۰۸۳ زده کوونکو ته ښوونیزې بستې ووېشلې.
د دغه ولايت د پوهنې رئيس مولوي اختر محمد زعيم د يادې شوې ادارې له مرستو څخه مننه وکړه.
