د کابل او پکتیا له پوهنې ریاستونو څخه خبرونه
د کابل ولایت د کلکان ولسوالۍ د پوهنې آمر محبوب الرحمن رحماني د دې ولسوالۍ د دیني مدارسو او ښوونځیو له مدیرانو سره په کاري غونډه کې له هغوی وغوښتل، چې د سالمې زده کړې له لارې ټولنې ته ژمن، بیدار او هوښیار نسل وړاندې کړي.
په بل خبر کې
د سروبي ولسوالۍ د پوهنې آمریت د تعلیمي څارنې غړو د دې ولسوالۍ د مرکزي دارالحفاظ له ښوونیزو او اداري فعالیتونو څخه لیدنه وکړه، ځینې نیمګړتیاوې او کاري ستونزې یې یاداښت کړې او د حل په موخه یې اړوندو مسوولینو ته لازمې لارښوونې وکړې.
پکتیا
د پکتيا ولايت پوهنې رئيس مولوي عبدالوکيل خالد د دې رياست له آمرینو او کارکوونکو سره غونډه وکړه، چې په دې غونډه کې یې د یادې ادارې له مسوولينو سره په مهمو او جدي موضوعاتو په باب خبرې وکړې ،د غونډې ګډونوالو ته يې د يووالي او اخلاص بلنه ورکړه او له هغوی يې وغوښتل، چې په اداري چارو کې قانوني چلند وکړي.
نوموړي له خلکو او ملي سوداګرو هم وغوښتل، چې له پوهنې ریاست سره ترخپله وسه مرسته وکړي.
د یو بل خبر له مخې
د پغمان ولسوالۍ د تعلیمي څارنې غړو د عبدالله جان شهید لېسې د اداري او تدریسي چارو د څارنې ترڅنګ د دغې لېسې زده کوونکو ته یې لازمې لارښوونې وکړې.
د پوهنې رياست د تعلیمي څارنې آمریت د یوې شفافې پروسې په ترڅ کې له ګاونډيو هېوادونو څخه له ٧٥ تنو راستانه شويو زده کوونکو څخه د سویې ازموینه واخیستله.
د دې ازموینې بریالي زده کوونکي به د ښوونځۍ په اووم، اتم او نهم ټولګیو کې کېنول شي.
