په بلخ ولایت کې د دیني زده کړو مرکزونو لپاره، د استادانو د ګمارلو په موخه، رقابتي آزموینه واخیستل شوه.
د افغانستان.ا.ا عالي رهبرۍ له لوري د اسلامي زده کړو مرکزونو لپاره د سل زره نويو بستونو له منظورۍ وروسته، د بلخ ولایت د اسلامي زده کړو مرکزونو لپاره ۱۴۴۵ بستونه ځانګړي شول.
د عدالت د تامين او يادو بستونو ته د پوهو او تجربه لرونکو کسانو د ګمارلو په موخه، د ياد ولايت د پوهنې رياست رقابتي آزموينې پروسه په لاره واچوله او دوه زره نوماندانو څخه يې رقابتي آزموينه واخيسته.
د ياد ولايت د نارينه وو او ښځينه وو لپاره د اسلامي زده کړو د مرکزونو د نشتوالي د ارزونې له مخې، په پام کې ده چې په دغو بستونو کې ١٢٦٠ تنه نارينه او ١٨٥ تنه ښځينه استادانې په دندو وګمارل شي.
د يادو بستونو لپاره د نوماندانو تر منځ د آزادې سيالۍ دغه پروسه د يو لړ هغو مراسمو په ترڅ کې چې د ياد ولايت والي، پوهنې رئيس، اداري اصلاحاتو او ملکي خدمتونو د کمېسيون استازو، نظامي چارواکو او يو شمېر ديني عالمانو پکې ګډون درلود، د مزارشريف روضې انګړ کې ترسره شوه.
د بلخ والي الحاج محمد يوسف وفا د يادې پروسې د څارنې تر څنګ، دا پروګرام د ديني زده کړو په برخه کې يوه ستره لاسته راوړنه وبلله او په روڼتيا يې ټينګار وکړ.
دغه راز د همدې ولايت د پوهنې رئيس الحاج مولوي عبدالجليل شهيدخېل هم په ياده پروسه کې د عدالت او روڼتيا پر تامين د ټينګار تر څنګ، ياد رياست ته د زياتو بستونو د ورکړې اعلان وکړ.
