د ولایتونو له پوهنې ریاستونو څخه د ځینو خبرونو لنډیز
لوګر
د لوګر ولایت پوهنې ریاست دازرې ولسوالۍ د ۲۵ خصوصي مدارسو د استادانو لپاره د ظرفیت لوړونې یو ورځنی سیمینار دایر کړ او هغوی ته یې د پوهنې وزارت کړنلارې او نوي تدریسي مېتودونه ور وښودل.
پنجشېر
دپنجشېر ولايت پوهنې رئيس مولوي غلام ایشان حماس د یاد ولايت پوهنې رياست له آمرینو او مدېرانو سره د ليدنې په ترڅ کې، دپوهنې په وړاندې دپرتو ستونزو د حل کولو او په ښوونځيو کې د درسي کيفيت په لوړولو تفصیلي خبرې وکړې.
د غونډې پرمهال ګډون والو، د خپل کاري بهیر ستونزې د پوهنې ریاست مشرتابه ته وړاندې کړې چې د پوهنې مسئولینو له لوري ورسره د همکارۍ ژمنه وشوه.
پکتيکا
د پکتیکا ولایت پوهنې ریاست ځانګړې غونډه د پوهنې رئیس الحاج مولوي عبدالقیوم فاروقي په مشرۍ ترسره شوه. په یاده غونډه کې له پوهنې سره مرسته کوونکو ادارو خپل تطبیق شوي فعالیتونه او راتلونکي پلانونه وړاندې او له مسئولینو څخه یې د آسانتیاوو د برابرولو غوښتنه وکړه.
غزني
د غزني ولایت پوهنې ریاست، د اداري او تدریسي خالي بستونو د ډکولو په موخه، له وړ کسانو څخه د آزادې سیالۍ آزموینه واخیسته، تر څو په یادو بستونو کې وړکسان وګمارل شي.
سمنګان
د سمنګانو ولايت پوهنې رياست د ښوونې او روزنې آمر او ورسره مل پلاوي، د حضرت علي لېسې او د خديجه الکبری ښځينه ښوونځي اداري او تدريسي چارې له نیږدې وڅېړلې او د حل په موخه يې اړوندو مسئولينو ته لازمې لارښوونې وکړې.
