د ولایتونو د ښوونیزو فعالیتونو په اړه څو لنډ خبرونه
سرپل
د سرپل ولایت پوهنې ریاست د یو لړ شاندارو مراسمو په ترڅ کې، د یاد ولایت د اسلامي زده کړو اړوند د ۵۸۹ بستونو د ډکولو په موخه د مدرسینو د ګمارنې پروسه، د ولایت مقام، د پوهنې مشرتابه او یو شمېر دیني علماوو په شتون کې پیل کړه.
لوګر
د لوګر ولایت پوهنې ریاست کاري غونډه د یاد ولایت پوهنې رئیس مولوي جنت ګل عزیزي تر څارنې لاندې، چې پکې د دولتي او خصوصي ادارو استازو ګډون درلود جوړه شوه.
په یاده غونډه کې د ګډون والو ترمنځ د راتلونکو ښوونیزو پلانونو په اړه نظرونه تبادله شول.
کابل
د زکات خیریه بنسټ له لوري د کابل ښار د حبیبیې لېسې پر ۲۰۰ یتیمانو او اړمنو زده کوونکو خوراکي توکي ووېشل شول.
د کابل ښار پوهنې رئیس حافظ عبدالباسط حقاني د یاد مرستندویه بنسټ څخه د مننې ترڅنګ، له هغوی غوښتل چې خپلې مرستې د یاد ښار ټولو ښوونځیو ته وغځوي.
پکتیا
د پکتيا ولايت پوهنې رياست له لوري په دې وروستيو کې د یاد ولايت د ښوونځيو د زده کوونکو ترمنځ د لښکر شيطان تر عنوان لاندې رقابتي آزموينه په لاره اچول شوې وه، چې پايلې يې د يو لړ مراسمو په ترڅ کې اعلان شوې او برياليو زده کوونکو ته ستاينليکونه او ډالۍ ورکړل شوې.
دایکنډي
د دایکنډي ولایت پوهنې ریاست د یاد ولایت مرکز اړوند په ۱۰ بابه ښوونځیو کې، د ساینسي علومو او ټکنالوژۍ د مرکز مسلکي کارکوونکي ګمارلي؛ چې د یادو ښوونځیو زده کوونکو ته په عملي او تجربوي ډول تدریس وکړي.
