په غزني ولایت کې د یوه ښوونځي د ودانۍ بنسټ ډبره کېښودل شوه
د غزني ولایت مرکز اړوند د امام هادي ښوونځي د بنسټ ډبره، د یو لړ مراسمو په ترڅ کې، چې پکې د یاد ولایت پوهنې مسئولینو، د یو شمېر دولتي او خصوصي ادارو استازو، علماوو او د سیمې خلکو ګډون درلود، کېښودل شوه.
په پلان کې ده چې یاد ښوونځی په دوه پوړونو کې د ۱۲ درسي ټولګيو او یو شمېر نور اړینو ملحقاتو لرلو سره په یو نیم جریبه ځمکه کې جوړ شي.
د دغه ښوونځي ټول مالي لګښت شاوخوا درۍ میلیونه افغانۍ اټکل شوی، چې د یاد ولایت د خلکو او سوداګرو له لوري ورکول کېږي او په جوړېدو سره به د ۱۲۰۰ هغو زده کوونکو لپاره چې په کرایي کورونو کې یې زده کړې کولې، د ښوونې او روزنې لپاره خوندي چاپېریال برابر شي.
د پوهنې ریاست مسئولینو او یو شمېر ویناوالو د خپلو خبرو په ترڅ کې، د یاد ښوونځي په جوړېدو خوښي وښوده او د پوهنې د بډاینې او پرمختګ په برخه کې یې د خلکو له مرستو مننه او قدرداني وکړه.
