له ولایتونو څخه د پوهنې خبرونو ته لنډه کتنه
غزني
د پوهنې وزارت د ارزونې او معیاري آزموینو ریاست پلاوي، د غزني ولایت په مرکز او ولسوالیو کې د دولتي او خصوصي ښوونیزو بنسټونو فعالیتونه وڅېړل.
د یاد ولایت پوهنې رئیس الحاج مولوي نصیر احمد حسیني ورغلي پلاوي ته ښه راغلاست ووایه او د لازمو آسانتیاوو په برابرولو کې یې د همکارۍ ژمنه وکړه.
نیمروز
د نیمروز ولایت پوهنې سرپرست مولوي عبدالغني شفیق په خپل کار دفتر کې د هرات ولایت د افغان ترک لېسې له مسئولینو سره وکتل.
د افغان-ترک لېسې استازو د خپل سفر موخه، په هرات ولایت کې د افغان-ترک لېسې ته د شاملېدونکو زده کوونکو د آزموینې د ورځې پېژندنه او نوم لیکنه وبلله او په یاده برخه کې یې د پوهنې له ریاست څخه د همکارۍ غوښتنه وکړه.
تخار
د تخار ولایت پوهنې ریاست او سویډن مؤسسې ترمنځ مشورتي غونډه جوړه او د یاد ولایت د ینګي قلعه، رستاق، خواجه غار، اشکمش، دشت قلعه او کلفګان ولسوالیو اړوند د ۷ بابه ښوونځيو بیارغونې په اړه تفصیلي خبرې وشوې.
په ورته مهال، د یادې مؤسسې مسئولينو ژمنه وکړه، چې ډېر ژر به د ښوونځیو پر اړوندو پروژو کارونه پيل کړي.
سرپل
د سرپل ولایت پوهنې ریاست، د پوهنې رئیس مولوي محمد رحماني او د یاد ریاست د یو شمېر نورو مسئولینو په حضور کې، د مرکز اړوند رحمت آباد عالي لېسې ۳۶۰ تنو زده کوونکو ترمنځ، د سیرت النبي(صلي الله علیه وسلم) سیالۍ ترسره کړې.
د سرپل پوهنې رئیس وويل، چې د یادو سياليو د پيلولو موخه، د ښوونځيو د زده کوونکو ترمنځ د اسلامي پوهې پياوړي کول او د ديني معلوماتو زیاتول دي.
لغمان
د لغمان ولایت پوهنې رئیس مولوي شاه جهان ساجد د یاد ریاست د کیفیت تضمین آمر سره په ګډه، د دغه ولایت دولت شاه ولسوالۍ اړوند د میا عبدالکریم، قلعه نجیل او زرکمر ښوونځیو له اداري او تدریسي چارو څخه څارنه وکړه.
