د ولایتونو د پوهنې په اړه څو لنډو خبرونو ته کتنه

ننګرهار

د پوهنې په برخه کې یوې همکارې ادارې، د ننګرهار ولایت شېرزادو ولسوالۍ د اشپان، څېلې او کدي خېلو د نجونو لومړنیو ښوونځیو لپاره د اوبو او نورو اړينو ملحقاتو زېرمې جوړې کړې، چې د پوهنې د مسئولینو او قومي مشرانو په ګډون د یو لړ مراسمو په ترڅ کې ګټې اخیستنې ته وسپارل شوې.

هلمند

د هلمند والي الحاج مولوي عبدالرحمن کندوزي په داسې حال کې چې د پوهنې ریاست د مشرتابه له لوري یې ملتیا کېدله، د ياد ولایت مرکز اړوند دارالعلوم فاروقیه مدرسې څخه لیدنه او څارنه وکړه.

پلاوي د يادې مدرسې له مسئولينو سره په ليدنه کې د اداري او درسي مسايلو د څېړلو پر مهال د هر ډول همکارۍ ژمنه وکړه.

غزني

د غزني ولایت پوهنې رئیس الحاج مولوي میرنصیر احمد حسیني، د ياد ولایت د مرکزي مدارسو او دارالحفاظونو له ۱۲۰ څخه زیاتو مسئولینو سره وکتل.

د پوهنې رئیس له ګاونډیو هېوادونو څخه د راستنېدونکو ماشومانو لپاره د زده کړو د آسانتياوو برابرولو، د مدارسو د درسونو بهیر، د هغوی د فراغت او تبديلۍ د څرنګوالي په اړه ګډون والو سره خبرې وکړې.

سرپل

د سرپل ولایت پوهنې رئیس مولوي محمد رحماني، د ياد ولایت مرکز اړوند د مجر هلکانو لېسې او د قدم جاى منځني ښوونځي له تدریسي بهیر څخه لیدنه وکړه.

د پوهنې رئیس له مسئولینو او دیني علماوو سره د لیدنې پر مهال، د پوهنې پر وضعیت خبرې وکړې او له پوهنيز نظام سره یې همکاري د هر فرد دیني دنده وبلله او په ياده برخه کې یې د دوی د همکارۍ غوښتنه وکړه.

تخار

د تخار ولایت په فرخار ولسوالۍ کې د ۶۰۰ ښوونځیو د زده کوونکو په ګډون د ا/ مارت پېژندنې تر نامه لاندې رقابتي آزموینه واخیستل شوه.

د يادې رقابتي آزموینې پوښتنې د.ا.ا.پر 22 کلنه مبارزه متمرکزې وې او په پام کې ده چې ممتازو زده کوونکو ته ډالۍ هم ورکړل شي.