له ولایتونو څخه د پوهنې څو لنډ خبرونه
غزني
د غزني ولايت پوهنې رئيس الحاج مولوي مير نصير احمد حسيني د یاد ولایت اندړو ولسوالۍ ته د سفر په ترڅ کې، له پوهنې مسئولينو، امنيې قوماندان، ديني علماوو او مشرانو سره په کتنه کې، د مدارسو او دارالعلوم د ستونزو په اړه تفصیلي خبرې وکړې او په دې برخه کې یې د یادو ادارو د همکارۍ غوښتنه وکړه.
د پوهنې رئیس او ورسره مل پلاوي د اندړو ولسوالۍ د دیني مدارسو تدریسي او اداري چارې هم له نیږدې وکتلې.
جوزجان
د جوزجان ولایت پوهنې رئیس الحاج مولوي محمد طاهر جواد، د مدارسو لیلیو جوړولو لپاره د مناسبو ځایونو د رامنځته کولو په موخه، د خصوصي مدارسو له څو څانګو څخه څارنه وکړه او د یادو مدارسو د لیلیو له مسئولینو او زده کوونکو سره یې وکتل.
د جوزجان پوهنې رئیس په غیر رسمي وخت کې مدارسو ته د یاد پلاوي د سفر موخه، د مدارسو د لیلیو مشخصول او د زده کوونکو لپاره د خوراکي توکو برابرول وبلل.
د مدارسو زده کوونکو او ښوونکو د پوهنې ریاست د مشرتابه له پاملرنې مننه او خوښي څرګنده کړه.
میدان وردګ
د میدان وردګ ولایت پوهنې رئیس مولوي محمد عثمان حریت او ورسره مل پلاوي، د یاد ولایت دایمیرداد ولسوالۍ له ولسوال شیخ نصیر احمد ثابت سره وکتل او د پوهنې د ستونزو په حل کې یې د همکارۍ غوښتنه وکړه.
د دایمیرداد ولسوال له پوهنې رئيس څخه د مننې په ترڅ کې د همکارۍ ژمنه وکړه.
لغمان
د لغمان ولایت پوهنې ریاست له ۲۴۰ تنو زده کوونکو څخه د یادې ولسوالۍ په دارالمعلمین کې د هغوی د زده کړو د دوام په موخه ډله ییزه آزموینه واخیسته؛ تر څو وړ کسان د دولت شاه ولسوالۍ دارالمعلمین ته وروپېژني.
کندهار
په کندهار ولایت کې سیمه ییزو ښوونځیو ته د درسي کتابونو د وېش لړۍ پیل شوه.
د کندهار پوهنې رياست وايي، د پنجوايي، ژېړۍ او شاوليکوټ ولسواليو په لسو ښوونځيو کې د کتابونو د وېش لړۍ پيل شوې او ډېر ژر به په نورو ولسواليو کې هم پيل شي.
