له ولایتونو څخه د پوهنې خبرونو لنډيز

هلمند
د هلمند ولایت پوهنې رئیس الحاج مولوي محمد عوض انصاري، د یاد ولایت سنګین ولسوالۍ ته د یو کاري سفر په ترڅ کې، د یو شمېر ښوونځیو د تدریسي او اداري چارو د کتلو ترڅنګ، د پوهنې له مسؤلینو، علماوو او قومي مشرانو سره وکتل.

همدارنګه:
د هلمند ولایت پوهنې ریاست مسئولینو، د یاد ولایت د مرکز او ولسوالیو د پوهنې له آمرینو او مدیرانو سره اداري ناسته وکړه او د دغه ولایت په ښوونځیو کې یې د څلور نیم میاشتنیو آزموینو د اخیستو پر څرنګوالي خبرې وکړې.
 د هلمند پوهنې ریاست مشرتابه د یادو آزموینو پر روڼتیا ټینګار وکړ.

بلخ
د بلخ ولایت پوهنې ریاست د مرکز او ولسوالیو د ښوونیزې څارنې غړو، د ښوونکو د مسلکي پراختیا په اداره کې د ګمارنې لپاره د تحصیلي اسنادو او کاري تجربو د ارزونې بهیر پیل کړی دی.
د ښوونکو د مسلکي کېدو د کړنلارې له مخې، د ښوونیزې څارنې غړي د ښوونکو د مسلک او کاري تجربې سره سم ټاکل کېږي.

بادغیس
د بادغیس ولایت د آبکمري ولسوال ملاعبدالله مسافر په مشرۍ،د پوهنې د کمېټې غونډه د پوهنې آمر او د دولتي ادارو د استازو په ګډون جوړه شوه.
په یاده غونډه کې د سواد زده کړې کورسونو پر وړاندې پرتو ننګونو او لاسته راوړنو خبرې وشوې او د ستونزو د حل په موخه رغنده نظریات او وړاندیزونه وړاندې شول.

ننګرهار
د ننګرهار ولايت پوهنې رئيس مفتي حبيب حضرت حقاني، د یاد ولايت د مرکز او ۲۲ ولسواليو د پوهنې او څارنې له مسئولينو سره ناسته وکړه او د ننګرهار ولايت د ښوونځيو د منظمو آزموينو د ترسره کولو په اړه يې مفصلې خبرې وکړې.