له ولایتونو څخه د پوهنې خبرونو لنډیز
لغمان
د پوهنې وزارت د سواد زده کړې ریاست یو پلاوي لغمان ولایت ته د خپل کاري سفر پر مهال هلته د سواد زده کړې د کورسونو له کړنو څخه د کتنې په ترڅ کې، د یادې څانګې ۱۵ تنو کارکوونکو ته درې ورځنی سمینار جوړ کړ.
د لغمان ولايت پوهنې رئيس مولوي شاه جهان ساجد له ياد پلاوي څخه د مننې په ترڅ کې، د علم حاصلول په ورځني ژوند کې يو اړين کار وباله او خلک يې زده کړې ته وهڅول.
همدارنګه:
د لغمان ولايت پوهنې رئيس دولت شاه ولسوالۍ ته د رسمي سفر پرمهال د پوهنې د وضعيت د څېړلو په ترڅ کې د پوهنې اړوند شاوخوا يو نيم جرېبه غصب شوې ځمکه په نښه او د پوهنې وزارت په ملکیت کې یې شامله کړه.
غزني
د غزني ولايت د پوهنې رئيس الحاج مولوي ميرنصير احمد حسيني تر څارنې لاندې د آزموینو ملي کمېټې د خالي بستونو د ډوکو په موخه، له نوماندانو څخه رقابتي آزموينه واخيسته، ترڅو مستعد کسان د څارونکو غړو په توګه په خالي بستونو کې وګمارل شي.
سرپل
د سرپل ولایت د بلخاب ولسوالۍ قومي مخورو، د یاد ولایت له پوهنې رئیس مولوي محمد رحماني سره وکتل.
همدارنګه یادو مشرانو له پوهنې رئیس سره د ښوونځیو او مدارسو د جوړولو، د تحصیلي بنسټونو د فعالولو او د پوهنې پر وړاندې د شته ننګونو د حل په اړه خبرې وکړې.
بل پلو د سرپل ولايت پوهنې رئيس ژمنه وکړه، چې د پوهنې په برخه کې به د خلکو د ستونزو په حل کې همکاري کوي او اولادونو ته به يې د زده کړو په برخه کې آسانتیاوې برابرې کړي.
فراه
د فراه ولایت شیبکوه ولسوالۍ اړوند د سپین کلي د کلي قومي مخور او عامو خلکو د یاد ولایت له پوهنې رئیس الحاج مولوي اختر محمد زعیم سره وکتل او په یاد کلي کې یې د فریب د منځني ښوونځي د جوړېدو او ترمیم په اړه کوم چې ځمکه یې د خلکو له لوري ورکړل شوې ده، خبرې وکړې.
د پوهنې رئیس قومي مخورو ته د یاد ښوونځي د ودانۍ د جوړېدو او د ښوونځیو او مدارسو د ستونزو د حل ژمنه ورکړه.
