د ولایتونو د پوهنې ځینو خبرونو ته یوه لنډه کتنه
ننګرهار
څو ورځې وړاندې د پوهنې وزارت د څېړنو رياست يو پلاوي د ننګرهار ولايت د پوهنې رياست د اداري، تدريسي، مالي او نورو مسايلو د څېړنې په موخه یاد ولايت ته رسمي سفر وکړ.
یاد پلاوي له یوې اوونۍ ارزونې وروسته د خپلو څېړنو پایلې د ننګرهار ولایت له پوهنې مشرتابه سره شریکې کړې.
جوزجان
د جوزجان ولایت پوهنې ریاست د یاد ولایت په مرکز شبرغان ښار کې د پوهنې رئیس الحاج مولوي محمد طاهر جواد، آمرینو او د ښوونځیو د مدیرانو په حضور کې د بېلابېلو ښوونځیو د ۱۳سپورتي لوبډلو ترمنځ د فوټبال سیالۍ پیل کړې.
د یاد ولايت د پوهنې مسئولين وايي، چې د دغو سياليو له پيلولو يې اساسي موخه، د زده کوونکو د استعدادونو وده او د ښوونځيو د زده کوونکو ترمنځ د غوره څېرو ټاکل دي.
ننګرهار
د ننګرهار ولایت په مرکز جلال آباد ښار کې د کمپیوټر له روزنیز کورس څخه ۳۳ تنه فارغ شول.
څه موده وړاندې ياد ښوونيز کورس د یو مرستندویه بنسټ له لوري د ننګرهار د پوهنې رياست په همغږۍ پيل شوی ؤ.
دغه راز فارغانو د پوهنې له رياست څخه د خوښۍ څرګندولو په ترڅ کې له همکارو بنسټونو وغوښتل، تر څو دغه ډول پروګرامونه د ولايت نورو برخو ته هم وغځوي.
غزني
د غزني ولایت پوهنې ریاست د شپې ښوونځیو اړوند له شاوخوا ۶۷۰ تنو زده کوونکو څخه د سویې د تثبیت آزموینه واخیسته.
کابل
د کابل ولایت پوهنې ریاست د یاد ریاست د ټکنالوژۍ عمومي مدیریت کې د دریو خالي بستونو د ډکولو په موخه، له ۲۰ تنو کسانو څخه آزموینه واخیسته. په پام کې ده، چې له ډلې به یې ۳ تنه وړ کسان په دندو وګمارل شي.
