د هلمند ولایت په غازي محمد ایوب خان عالي لېسه کې د يو باب کتابتون پرانيسته او د نیالګیو کښېنولو کمپاين تر سره شو
د هلمند ولايت په غازي محمد ایوب خان عالي لېسه کې د يو باب کتابتون د پرانیستلو او د نیالګیو اېښودلو په مراسمو کې د ياد ولايت پوهنې رئیس الحاج مولوي محمد عوض انصاري، د لېسې استادانو او زده کوونکو ګډون درلود.
غونډه د قرآن کریم د څو مبارکو آیتونو په تلاوت سره پیل شوه؛ ورپسې د هلمند پوهنې رئیس د یاد ولایت زده کوونکي او ځوانان د کتاب لوستلو ته وهڅول او له هغوی یې وغوښتل، تر څو په خپلو ښوونځیو او مدارسو کې لږ تر لږه یو-يو نیالګي کېنوي، چې د خپلو کورونو او ښوونيزو بنسټونو د چاپېریال او هوا په پاکوالي او آبادۍ کې خپل ملي مسئولیتونه سرته ورسوي.
باید وویل شي، چې د يادې لېسې کتابتون ټولټال ۱زره ۲۸۰ ټوکه دیني او مطالعاتي کتابونه لري، چې د زده کوونکو د علمي کچې د لوړولو په موخه به ترې کار واخيستل شي.
دغه راز د پسرلي د رارسېدو او د طبيعت د تازه والي د موسم د پيل په مناسبت د غازي محمد ايوب خان لېسې په انګړ کې ۳۱۶ مېوه لرونکي او بې مېوې نيالګي کښېنول شول.
