په بلخ ولایت کې د یوې دیني مدرسې بنسټ ډبره کېښودل شوه
د بلخ ولایت مرکز مزارشریف ښار په شهر نو سیمه کې د امام بخاري رحمه الله «نور المدارس مدرسې» د ودانۍ بنسټ ډبره کېښودل شوه.
دبلخ ولايت پوهنې رئيس الحاج مولوي عبدالجليل شهید خېل د څرګندونو له مخې: ددغه مدرسې د ودانۍ جوړولو لګښت ۶ ميليونه ډالره اټکل شوى دى، چې دپوهنې په برخه کې د يو همکار بنسټ له خوا ورکول کيږي.
د يادې مدرسې د بنسټ په مراسمو کې د پوهنې په رئیس او مسئولينو سربېره، د بلخ ولايت مرستيال الحاج مولوي نورالهادي ابو ادريس، يو شمېر علماوو، استادانو او په یاد ولایت کې مېشت د ازبکستان سرقونسل ښاغلي فرقت نظروف هم ګډون درلود.
مسئولينو په خپلو خبرو کې وويل، چې د دغې مدرسې جوړېدل د اسلامي زده کړو د پراختيا او د ټولنې د اصلاح په برخه کې خورا مهم دي.
د خلکو استازو د هېواد بچیانو لپاره د ښوونیزو خدمتونو د وړاندې کولو په برخه کې د پوهنې وزارت د رهبرۍ له پاملرنې مننه او قدرداني وکړه.
