د افغان-ترک ښوونځیو پلاوي دکابل ښار له پوهنې رئیس سره وکتل
د افغان- ترک دارالعلومونو آمر دکتور محمد چلن او د افغان -ترک لېسو آمر وجهات اونل، د کابل ښار له پوهنې رئیس قاري عبدالباسط حقاني سره د نوموړي په کاري دفتر کې وکتل او د علاقې وړ موضوعاتو په اړه یې خبرې او نظرونه تبادله کړل.
په پیل کې د کابل ښار پوهنې رئیس ورغلي پلاوي ته ښه راغلاست ووایه او له افغانستان سره یې د ترکیې هېواد مرستو ته په اشارې، له پوهنې ریاست سره د دوی د همکاریو قدرداني وکړه.
ورپسې پلاوي د افغانستان له ښوونیز نظام سره خپله همکاري څرګنده کړه، د دارالعلومونو او افغان- ترک ښوونځیو په ګډون یې د نویو زده کوونکو د جذبولو پر کړنلارې تفصیلي خبرې وکړې، افغان لوري له هغوی وغوښتل چې د خلکو اقتصادي وضعیت ته په پام سره د زده کوونکو د میاشتنیو فیسونو په راکمولو کې همکاري وکړي.
غونډه د یو لړ پرېکړه لیکونو سره پای ته ورسېده.
