د فراه او زابل ولایتونو له ښوونځیو سره د ۲۱۴ زره ډالرو په ارزښت د درسي موادو مرسته وشوه
یوې مرستندویه ادارې د فراه او زابل ولایتونو د ښوونځیو لپاره د ۲۱۴ زره امریکایي ډالرو په ارزښت د تعلیمي موادو مرسته وکړه. په هغه غونډه کې چې په همدې موخه د زابل ولایت پوهنې ریاست په انګړ کې جوړه شوې وه، د یادو ولایتونو د پوهنې ریاست مسئولینو، چارواکو، علماءکرامو او قومي مخورو ګډون درلود. د زابل پوهنې رئيس مولوي ګل ولي متقي د خپلو خبرو پرمهال، د دغه ولايت په لرو پرتو سيمو کې د زده کوونکو لپاره د اړتيا وړ درسي مواد برابرولو له امله له خلکو څخه وغوښتل، چې د ښوونیزو مرکزونو د پراختیا په برخه کې د پوهنې وزارت سره خپلو مرستو ته دوام ورکړي. ولسونو او مخورو هم په خپلو خبرو کې د هېواد بچیانو د تعلیمي ستونزو د حل له امله د پوهنې وزارت څخه مننه وکړه او د هر اړخیز ملاتړ ژمنه یې وکړه.
