د پوهنې وزارت سرپرست نیمروز ولایت ته په رسمي سفر ولاړ
د هېواد د پوهنې وزارت سرپرست الحاج مولوي حبیب الله آغا د هلمند ولایت پوهنې رئیس الحاج مولوي محمد عوض انصاري په ملتیا، نیمروز ولایت ته رسمي سفر وکړ او د یاد ولایت له پوهنې رئیس الحاج مولوي ګل احمد حقاني سره یې د لیدنې پر مهال، د ښوونیز وضعیت لاښه والي او پر یو لړ مهمو مسایلو خبرې وکړې.
د پوهنې وزارت سرپرست د دغه سفر په ترڅ کې د پوهنې ریاست له اداري چارو څخه د کتنې ترڅنګ، د نیمروز ولایت له جهادي مرکزي مدرسې او یو شمېر نورو ښوونیزو بنسټونو څخه هم لیدنه وکړه او هلته یې له مهتممینو، علماء کرامو، زده کوونکو، ښوونکو، دیني علماوو او قومي مشرانو سره وکتل.
په دغو ناستو کې د ځایي مسئولینو نظریات او وړاندیزونه واورېدل شول او د پوهنې وزارت مشرتابه له دوی سره د شته ستونزو په حل کې د همکارۍ ژمنه وکړه.
