د بامیان ولایت د ښوونځیو مدیرانو لپاره مسلکي سیمینار ترسره شو
د باميان ولايت پوهنې رئيس قاري عنايت الله سهار له خوا د یاد ولايت د پوهنې مسئولينو، چارواکو، مديرانو او ښوونکو په حضور کې د "مسلکي پراختيا د غړو د دندو لایحې" تر عنوان لاندې سيمينار د غلغلې هوټل په تالار کې جوړ او په ترڅ کې یې د ښوونځیو د مدیرانو د دندو لایحه په سمه توګه تحلیل او توضېح شوه.
د باميان پوهنې رئیس د ښوونځيو د مديرانو لپاره د جوړ شوي سيمينار پر مهال له پوهنیز نظام څخه د هغوی د ملاتړ له امله مننه وکړه او له ګډون والو يې وغوښتل چې په دغه ولايت کې د زده کوونکو د کيفيت او کميت لوړولو لپاره خپلې هڅې وکړي.
په پای کې د ښار پوهنې مسئولینو هم خپلې لاسته راوړنې او وړاندیزونه مطرح کړل او د پوهنې له رئیس سره یې د هر اړخیزې همکارۍ ژمنه وکړه.
