د پوهنې وزارت سرپرست په ننګرهار ولایت کې د افغان – ترک ښوونځیو څخه لیدنه وکړه
د پوهنې وزارت سرپرست الحاج مولوي حبیب الله آغا ننګرهار ولایت ته د خپل رسمي سفر په ترڅ کې، د یا ولایت د پوهنې رئیس مولوي محمد شریف حلیمي، په افغانستان کې د ترکیې سفیر ښاغلي جنک اونال او مسئولینو په ملتیا د افغان – ترک ښوونځیو څخه لیدنه وکړه.
د پوهنې وزارت سرپرست د ښوونیز چاپېریال د ارزونې پر مهال، د افغان-ترک ښوونځیو له مسئولینو او ښوونکو څخه د پوهنیزو آسانتیاوو برابرولو له امله مننه وکړه او له زده کوونکو یې وغوښتل چې په خپلو درسونو کې زیاتې هڅې وکړي.
د يادونې وړ ده، چې د پوهنې وزارت سرپرست د ننګرهار له والي حاجي ملا محمد نعيم آخند سره هم د دغه ولايت د ښوونيز وضعيت په اړه خبرې وکړې.
د ننګرهار ولایت رهبري د پوهنې وزارت له پلانونو د ملاتړ ترڅنګ، د دغه وزارت د ښوونیزو پروګرامونو د پلي کېدو په برخه کې مشرتابه ته ډاډ ورکړ.
