د اسلامي زده کړو معین لخوا په میدان وردګ ولایت کې د یو محراب جومات بنسټ ډبره کېښودل شوه

د پوهنې وزارت د اسلامي زده کړو معین الحاج مولوی کرامت الله «آخندزاده»، میدان وردګ ولایت ته د خپل سفر پرمهال د علماءکرامو، قومي مشرانو، مخورو شخصیتونو او سیمه ییزو اوسېدونکو په حضور کې، د چک ولسوالۍ اړوند جامعة‌ الجهاد دیني مدرسې په انګر کې د یو محراب جومات د ودانۍ بنسټ ډبره کېښوده.
په پلان کې ده، چې پورته ذکر شوی جومات به په یو وخت کې له زرو څخه زیاتو لمونځ کونکو ظرفیت ولري او دا به د ځایی اوسېدونکو په مالي ملاتړ جوړ شي.
د اسلامي زده کړو معین د پورته ذکر شوي جومات د بنسټ ډبرې اېښودلو په مراسمو کې څرګنده کړه: "موږ هڅه کوو چې د زده کړې او عبادت لپاره ځانګړی معیاري چاپېریال رامنځته کړو، تر څو راتلونکي نسلونه وکولی شي د حقیقت، عدالت، تقوا او اخلاص مشعلونه په خپلو منځو کې روښانه وساتي."
د یادونې وړ ده، چې د پوهنې وزارت دغه ګامونه د اسلامي مقدساتو د ساتنې، پالنې او د تعلیمي مرکزونو لاپراختیا په برخه کې د اړوندو فعالیتونو څرګنده نښه ده.