د نورستان ولایت د ښوونځیو ۱۳۵ تنو ښوونکو لپاره روزنیز ورکشاپ پیل شو
د نورستان ولایت مرکز پارون په شمول د واما، وایګل او کانتیوا ولسوالیو د لومړنیو ښوونځیو ۱۳۵ تنو ښوونکو د مسلکي او مهارتي وړتیاوو لوړولو په موخه، ۶ ورځنی روزنیز ورکشاپ د پوهنې وزارت سره د یوې همکارې ادارې په مالي ملاتړ پیل شو.
دیاد ورکشاپ د پرانیستې په مراسمو کې، د نورستان ولایت پوهنې ریاست مسئولینو، دغه ډول پروګرامونه د ښوونکو علمي وړتیاوو لوړولو لپاره ګټور وبلل او له ګډونوالو یې وغوښتل چې د ورکشاپ ترلاسه کړي مهارتونه په خپلو اړوندو ښوونځیو کې په مسلکي ډول پلي کړي.
په دې روزنیز ورکشاپ کې به ښوونکي د نویو تدریسي مېتودونو، د ټولګي مدیریت، د زدهکوونکو ارزونې او شاګردمحوره تدریسي روشونو په برخو کې روزنه ترلاسه کړي.
ګډونوالو ښوونکو د همدغه ورکشاپ له ترسره کېدو څخه د هرکلي ترڅنګ وویل چې، د روزنې ترلاسه کولو وروسته به دوی په خپلو اړوندو ښوونځیو کې مسلکي تدریس ته دوام ورکړي.
