د ولس په همکارۍ په پکتیا ولايت کې د یوه ښوونځي نوې ودانۍ ګټې اخیستنې ته وسپارل شوه
د پکتیا ولایت مرکز ګردېز اړوند د محمودکلا منځني ښوونځي لپاره د ولسي خلکو په مالي همکارۍ د ۱.۱ میلیون افغانیو په لګښت نوې ودانۍ جوړه او ګټې اخیستنې ته وسپارل شوه.
یاده ودانۍ شپږ درسي خونې، یوه اداري خونه، یوه تحویلخانه او د پاکو اوبو سیسټم لري.
د ياد ولايت پوهنې رئیس مولوي عبدالقیوم فاروقي د سیمې له خلکو د ښوونځي د ودانۍ جوړولو له امله مننه وکړه او ویې ویل:" د مناسب ښوونیز چاپېریال رامنځته کول د معیاري زدهکړو لپاره مهم رول لري". نوموړي زیاته کړه، د ۱۴۰۵ کال په ترڅ کې د پکتیا خلکو د پوهنې له برخې سره د ۱۷ میلیون افغانیو په ارزښت بېلابېلې مرستې کړې دي.
