بامیان ولایت کې د ۷ میلیونه افغانیو په لګښت د ۱۰ بابه ښوونځیو د ترمیم پروژه پیل شوه
د بامیان ولایت مرکز اړوند دره فولادي ذکریا لېسه کې، د ۷ میلیونه افغانیو په لګښت د ۱۰ بابه ښوونځیو د ترمیم او بیارغونې پروژه د پوهنې مسئولینو، د ولایت مقام چارواکو، علماءکرامو، د خیریه بنسټونو استازو او د سیمې د مخورو په حضور کې پیل شوه.
یاده پروژه د یوه خیریه بنسټ په مالي ملاتړ عملي کېږي، چې له مخې به یې د بامیان ولایت د سیغان، شبر ولسوالیو او مرکز اړوند ۱۰ بابه ښوونځي په اساسي ډول ترمیم او ورغول شي.
د یاد ولایت والي محترم حاجي قاري ګل حیدر شفق د غونډې پر مهال د پوهنې وزارت او ملاتړو بنسټونو له هڅو مننه وکړه او د علم او پوهې پر ارزښت یې ټینګار وکړ. نوموړي وویل: «علم او پوهه په ټولنه کې لوړ ارزښت لري او باید د هېواد بچیانو ښوونې او روزنې ته جدي پاملرنه وشي.»
همدارنګه د بامیان ولایت پوهنې رئیس محترم قاري عنایتالله سهار د روانو فعالیتونو راپور وړاندې کړ او د پوهنې د کیفیت لوړولو لپاره یې د دغه ریاست له دوامداره هڅو خبر ورکړ.
نوموړي ژمنه وکړه چې د ولایت په کچه به د ښوونځیو د وضعیت ښهوالي بهیر په جدي ډول تعقیب شي.
