تخار کې د یو منځني ښوونځي د جوړېډو چارې پیل شوې
د تخار ولايت د مرکز اړوند د بی بی ساره منځني ښوونځي د ودانۍ بنسټ ډبره د یو لړ مراسمو په ترڅ کې کېښودل شوه. په دغو مراسمو کې د تخار والی عبدالحق شفق ، دپوهنې رییس، د دولتي ادارو یو شمیرمسوولینو، قومي مشرانو، ښوونکو او زده کوونکو ګډون کړی وو.
د نوموړې ښوونځي ودانۍ په پاخه او اساسي ډول د ۱۶ میلیونو افغانیو په مجموعي لګښت د یو کال په موده کې جوړېږي، چې ۱۴ درسي ټولګي، ۴ اداري خونې، احاطوي دېوال، عصري تشنابونه او نورې اړوندې اسانتیاوې به ولري.
د یادولو وړ ده، چې د ښوونځي د نوې ودانۍ له جوړېدو او پرانېستو سره به د یادې سیمې سلګونو زده کوونکو ته د زده کړو خوندي درسي چاپېریال برابر شي.
