د اروزګان ولایت په یو شمېر ښوونځیو کې د لمریزې برېښنا او حفظ الصحې سیسټمونه فعال شول
د اروزګان ولایت د پوهنې ریاست د هڅو په پایله کې د "واش" پروګرام له لارې، چې لګښت یې د یو همکار بنسټ له خوا ورکول کیږي، د وزیر اکبرخان، عایشه زایي په ښوونځیو او د یاد ولایت چورې ولسوالۍ اړوند په یو باب منځني ښوونځي کې د حفظ الصحې او پاکو اوبو سیسټمونه فعال شول.
د يادو پروژو د پرانیستې په مراسمو کې، د دغه ولايت د پوهنې رياست مشرتابه، د همکارو بنسټونو استازو، علماوو او قومي مشرانو برخه اخيستې وه.
د اروزګان ولايت پوهنې رئيس الحاج مولوي شمس الله آخندزاده کامران، د پوهنې په برخه کې د ملاتړو ادارو له همکارۍ څخه د مننې ترڅنګ، د يادو ښوونځيو له ښوونکو او زده کوونکو وغوښتل، تر څو د خپلو ښوونځيو د تاسیساتو پالنې او ترمیم ته جدي پاملرنه وکړي.
د ښوونځيو ښوونکو او زده کوونکو په خپلو ښوونځيو کې د روغتيايي آسانتياوو پر برابرېدلو خوښې څرګنده او د پوهنې وزارت له هڅو يې ستاينه وکړه.
