د بلخ له پوهنې ریاست څخه خبرونه
د بلخ ولایت د البرز ولسوالۍ له خالد بن ولید، عبدالله بن عباس او د مظاهر العلوم له دارالعلومونو او دارالحفاظونو څخه ۲۲ تنه د قرانکریم حافظان فارغ شول. او یاد فاضلان د نوموړي ولسوالۍ د پوهنې د مسوولینو، علماوو او د زده کوونکو د والدینو په حضور کې وستایل شول.
د دهدادي ولسوالۍ د تعلیمي څارنې آمر د دې ولسوالۍ د پوهنې کارکوونکو ته د ديني درسونو د تدريس په سلسله کې، دا اوونۍ د قيامت د نښو نښانو په باب موضوعات تشریح کړل او ګډونوال يې وهڅول، چې په ټولنه کې د الله ج احکام پلي کړي.
د مارمل ولسوالۍ د قرانطوقي کلي له عثمانیه دارالحفاظ څخه ۴۵ تنه فاضلان فارغ شول. یاد فاضلان د یوې سترې غونډې په ترڅ کې د پوهنې آمریت د مسوولینو، علماوو او مشرانو په حضور کې وستایل شول
ويناوالو د ديني علومو د زده کړې پر ارزښت او په ځانګړې توګه ځوانانو ته د زده کړې پر اهمیت خبرې وکړې.
د پوهنې ریاست مشرتابه او د دې ریاست ښوونکو، زده کوونکو او مسوولینو د بلخ ولایت د والي الحاج مولوي محمد داوود مزمل د فاتحې په مراسمو کې ګډون وکړ او د دغه شهید روح ته یې دعا وکړه.
د مارمل ولسوالۍ د پوهنې آمر خپلو کارکوونکو ته د دیني درسونو په سلسله کې دا اوونۍ د شفاعت او د شفاعت پر ډولونو خبرې وکړې.
