د سمنګان ولایت پوهنې ریاست انګړ کې د یو جومات لپاره د بنسټ ډبره کېښودل شوه
د سمنګان ولایت د والي الحاج مولوي عبدالاحد «فضلي»، پوهنې رئیس الحاج مولوي نصرت الله «فیضاني»، یو شمېر علماوو او قومي مشرانو په ګډون د یو لړ مراسمو په ترڅ کې، د پوهنې ریاست په انګړ کې د یو محراب جومات لپاره د بنسټ ډبره کېښودل شوه.
د سمنګان ولایت پوهنې رئیس الحاج مولوي نصرت الله «فیضاني» د غونډې ګډون والو ته د ښه راغلاست په ترڅ کې وویل: یاد جومات به د پوهنې وزارت له بودیجې څخه د پوهنې ریاست په هڅو په پاخه او اساسي ډول جوړېږي.
نوموړي څرګنده کړه، دغه سپېڅلی ځای به په ۲۹۵ متر مربع مساحت کې جوړ شي، چې په یو وخت کې به د ۳۰۰ لمونځ کوونکو ظرفیت ولري.
د یاد جومات د جوړولو ټولیز لګښت ۳ میلیونه ۷۵۰ زره ۲۹۰ افغانۍ اټکل شوی، چې د جوړېدو چارې به یې په درې نیمو میاشتو کې بشپړې شي.
د ولايت مقام مرستيال مولوي داد خدا «خادم» او نورو ويناوالو د اسلام له نظره د جومات په اهميت او د ټولنې په اصلاح کې يې د رول په اړه خبرې وکړې او يادونه يې وکړه چې د دیني علماوو په مشوره او لارښونه يې دغه جومات د «اصحاب صُفه»په نوم نومولی دی.
