د غمرازۍ پيغام
په خورا خواشينۍ مو خبر ترلاسه کړه، چې د ننګرهار ولايت د پوهنې رياست مالي او اداري مرستيال سيد عيسى سادات په يوې ترافيکي پيښه کې خپل ژوند له لاسه ورکړ.
(اناالله و انا اليه راجعون)
مرحوم سيد عيسى سادات په ۱۳۳۸ کال د ننګرهار ولايت سرخ رود ولسوالۍ کې زوکړى وه، لومړنۍ او منځنۍ زده کړې يې په ننګرهار ولايت کې پاى ته رسولې وي او همداراز لوړې زده کړې يې هم ياد ولايت پوهنتون کې ترسره کړې وې.
د ۱۳۸۶-۱۳۷۱ کلونو په اوږدو کې يې د ننګرهار په يو شمير ښوونځيو کې د ښوونکي، سر ښوونکو او آمر په توګه دنده ترسره کړې.
په ۱۳۸۶ کال کې د آزادې سيالۍ له لارې د ننګرهار ولايت د پوهنې رياست مالي او اداري مرستيال وټاکل شو.
نوموړى دنده ژمن شخص وه او خپله دنده يې په پوره صداقت او ريښتينولۍ سره ترسره کوله.
د پوهنې وزارت مشرتابه، د ښاغلي سادات مړينه د افغانستان د پوهنې کورنۍ ته يوه سرته ضايعه ګڼي، د الله تعالى له درباره کورنۍ او خواخوږو ته يې جميل صبر او مرحوم ته فردوس جنت غواړي.
