د لغمان له پوهنې ریاست څخه خبرونه
د لغمان پوهنې ریاست په دغه ولایت کې د یونیسف سیمه ییز دفتر په مالي مرسته د نویو زده کوونکو د جذبولو کمپاین پیل کړ.
د دغه پروګرام د پرانیستلو په مراسمو کې د دغه ولايت د پوهنې د مسوولينو او د يادې شوې موسسې پر مسوولينو سربېره د خلکو استازو او قومي مخورو هم برخه اخيستې وه.
ويناوالو د علم او پوهې پر اهميت خبرې وکړې او له خلکو یې وغوښتل چې خپل ماشومان ښوونځيو کې شامل کړي.
د لغمان ولایت د مهترلام ښار د پوهنې آمر قاري صدیق الله طارق او د تعلیمي څارنې مسلکي غړو د دغه ولایت د ډاکټر عبدالله لغماني او د نمبر ۲ تجربوي ښوونځیو د اداري او تدریسي چارو د څارنې پرمهال د يادو ښوونځيو له مديرانو او ښوونکو سره د تدریسي مسایلو په باب خبرې وکړې.
د قرغیو ولسوالۍ د پوهنې آمریت غړو د کاشمند لیسې او د صواتي منځني ښوونځي د ښوونکو تدریسي چارې، کمپیوتر خونو او له کتابتونونو څخه څارنه وکړه او د چارو د لا ښه والي په موخه یې د یادو دوو ښوونځیو له مسوولینو او ښوونکو سره مشورتي ناسته وکړه.
همدارنګه:
په لغمان ولایت کې د ابرار موسسې په ملاتړ د سیمه ییزو او چټکو زده کړو د ۹ ټولګیو پر زده کوونکو کتابچې ووېشل شوې.
د دولت شاه ولسوالۍ د پوهنې او تعلیمي څارنې آمرینو د دغه ولایت د پوهنې ریاست د لارښوونو د عملي کولو په باب د دې ولسوالۍ د ټولو ښوونځیو او دیني مدارسو له مدیرانو سره خبرې وکړې.
همدارنګه:
نوموړو غړو د همدې ولسوالۍ د دوو ښوونځيو له اداري او تدريسي چارو څخه هم څارنه او لیدنه وکړه.
د مهترلام ښار د تعلیمي څارنې آمر مولوي عبدالمتین مبشر له خپل مل پلاوي سره د روښان عالي لېسې، ډاکټر عبدالله، مهتر لمک او د تجربوي ښوونځيو اداري او تدریسي چارې وڅارلې او د زده کوونکو د زده کړې کچه یې هم وارزوله.
