د لوګر د برکي برک ولسوالۍ د سیمه ییزو او چټکو زده کړو ښوونکو روزنه پیل شوه
د لوګر ولایت د برکي برک ولسوالۍ د سیمه ییزو او چټکو زده کړو ۶۷ نوېو ګومارل شوېو ښوونکو ته څوارلس ورځنۍ روزنه پیل شوه.
دا روزنه د پوهنې ریاست په همغږۍ د ودان موسسې له خوا ورکول کېږي، چې ۴۸ نارینه ښوونکي او ۱۹ ښځینه ښوونکې په کې برخه لري.
په دغه څوارلس ورځنیو زده کړو کې، ښوونکو ته د دوی د ظرفیت لوړونې په مؤخه د تدریس د نوېو لارو چارو په برخه کې مسلکي روزنه ورکول کېږي.
د لوګر د پوهنې ریاست، د یونیسف او ودان موسسو په مرسته، په برکي برک ولسوالۍ کې ۵۰ سیمه ییز او ۱۷ د چټکو زده کړو نوي ټولګي جوړ کړي دي.
د نوموړو ټولګیو په جوړولو سره، له زده کړو ۲۲۰۰ بې برخو ماشومانو ته، چې ۱۸۵۹ یې نجونې او ۳۴۱ یې هلکان دي د زده کړو ویلو زمینه برابره شوې ده.
یاد ټولګي، له لومړي ټولګي نیولې تر درېیم ټولګي پورې ټولګي لري، د رسمي ښوونځیو په څېر په کې تدریس کېږي، چې تر درېیم ټولګي وروسته زده کوونکي به یې په رسمي ښوونځیو کې جذب شي.
