د لوګر د ښوونځیو مسوولینو ته د کانکور د آمادګۍ روزنه ورکړل شوه
د پوهنې وزارت_لوګر: د لوګر ولایت د ځینو لېسو مدیرانو او سر ښوونکو ته د کانکور ازموینې له پروسې سره د زده کوونکو د بلدېدو په موخه روزنه ورکړل شوه.
دغه روزنه د لوړو زده کړو وزارت ورکړه، چې موخه یې د کانکور د راتلونکي ازموینې له اصلي بهیر سره د زده کوونکو بلدول او چمتو کول دي.
په یاده روزنه کې د ښوونځیو مدیرانو او سر ښوونکو ته د کانکور ازموینې د پروسې په اړه اړینې لارښوونې او معلومات ورکړل شول.
د لوګر د پوهنې سرپرست رئیس نثار احمد سیدي پر یادې روزنې خوښي وښودله او دا یې د کانکور ازموینې له پروسې سره د زده کوونکو د بلدېدو ښه طریقه یاده کړه.
هغه زیاته کړه، چې ډېر ژر به د روزل شویو مدیرانو او سرښوونکو له خوا د کانکور ازموینې ګډونوالو ته د کانکور د آمادګۍ پروګرامونه په لاره واچول شي.
د یادونې وړده، چې د لوګر د کانکور را روانې ازموینې ته د ۳۶۰ نجونو په ګډون ۳۴۰۰ تنو خپل نومونه لیکلي دي.
