د لوګر له دوو ښوونیزو مرکزونو سره د ځمکې مرسته وشوه

د پوهنې وزارت_لوګر: د لوګر د ازرې ولسوالۍ دوو قومونو له دوو ښوونیزو مرکزونو سره د ودانیو جوړېدو په موخه د ځمکې مرسته وکړه.
د ځمکې دغه مرسته د عزیزالمدارس له دیني مدرسې او دغه راز د دارالمعلمین له حمایوي څانګې سره شوې ده.
د عزیزالمدارس دینې مدرسې ته ۲۸۵۰ مترمربع ځمکه د فتح خیلو قوم او د دارالمعلمین حمایوي څانګې ته ۳۲۰۰ متر مربع ځمکه د اکبر خیلو قوم کړې ده.
دغه دواړو ښوونیز مرکزونه ودانۍ نه لري،چې زده کوونکي یې د کلیوالو له خوا په ورکړل شویو شخصي کورونو کې زده کړې کوي.
د لوګر د پوهنې رئیس عبدالوکیل کلیوال له نوموړو ښوونیزو مرکزونو سره د یادو قومونو د ځمکې د مرستې ستاینه وکړه.
هغه وویل،چې یادو ښوونیزمرکزونو ته د ودانیو جوړېدو پروژې منظورې شوي،چې په راتلونکو ورځو کې به یې عملي چارې پیل شي.
د یادونې وړده، چې د لوګر اوسېدونکو له دې مخکې هم ښوونځیو ته د ودانیو جوړېدو لپاره د ځمکو مرستې کړي.