د لوګر ولايت په ۳ بابه ښوونځيو کې څو پروژې پيل شوې
د لوګر ولایت د محمدآغې ولسوالۍ په ۳ بابه ښوونځيو کې يو شمېر پروژې، چې پکې د احاطوي دېوالونو جوړول، د اوبو د څو څاګانو کیندل، د اوبو رسولو د شبکو فعالول، د برېښنا د سولر تختو نصبول او د يو شمېر نورو اړينو ملحقاتو جوړول شامل دي، پیل شوې.
د يادو پروژو عملي چارې د یو لړ مراسمو په ترڅ کې چې پکې د لوګر ولایت پوهنې ریاست مسئولینو، قومي مخورو، دیني علماوو، د ملکي او نظامي ادارو چارواکو، د همکارو بنسټونو استازو، ښوونکو او زده کوونکو ګډون کړی وو، پیل شوې.
د دغه پروژو ټوليز لګښت ۱۵ ميلیونه افغانۍ اټکل شوی، چې د یاد ولایت د پوهنې مسئولینو په وینا، د یو همکار بنسټ د ساحوي دفتر له لوري ورکول کېږي.
د لوګر ولايت پوهنې رئيس د ياد مرسته کوونکي بنسټ له همکاريو څخه د مننې په ترڅ کې وويل : د دغه پروژو کارونه به په دريو مياشتو کې بشپړ او ګټې اخستنې ته وسپارل شي.
د يادونې وړ ده، چې د پروژو په بشپړېدو سره به د يادو ښوونځيو ۲ زره زده کوونکو ته لازمې آسانتياوې او مناسب ښوونيز چاپېريال برابر شي.
