د لوګر ۶۶ ښوونځیو ته لابراتواري وسایل ورکړل شول

د پوهنې وزارت_لوګر: د لوګر د مرکز او ولسوالیو ۶۶ ښوونځیو ته د لابراتواري څانګو د مجهزولو لپاره لابراتواري وسایل ورکړل شول.
یاد وسایل د پوهنې وزارت د ساینس او ټکنالوژۍ ریاست له خوا ورکړل شول، چې شاوخوا ۱۱۶ زره افغانۍ ارزښت لري.
په دغو وسایلو کې د فزیک، کیمیا،ریاضي او بیولوژي په برخه کې تجربوي وسایل، لارښود کتابونه، ښوونیز چارټونه او میزونه شامل دي، چې هر ښوونځي ته د اړتیا وړ وسایل ورکړل شول.
د لوګر د پوهنې رئیس عبدالوکیل کلیوال وایي ،چې د روان ښوونیز کال په پیل کې یې د پوهنې له وزارته د نوموړو لابراتواري وسایلو د مرستې غوښتنې کړې وه.
د پوهنې رئیس زیاته کړه،چې یاد لابراتواري وسایل به د زده کوونکو لپاره په عملي زده کړو کې ډېره ګټه وکړي.
د یادونې وړده، چې د لوګر ولایت ۲۷۳ ښوونځي لري، چې په ۱۲۰ ښوونځیو کې یې د لابراتوار څانګې فعالې دي.