د هېواد په مرکز او ولایتونو کې نوی ۱۴۰۴ ښوونیز کال د یو لړ شانداره مراسمو په ترڅ کې پیل شو
د هېواد په سړو سیمو او ولايتونو کې نوی ۱۴۰۴ ښوونیز کال په جلا جلا توګه د یو لړ شانداره او ځانګړو مراسمو په ترڅ کې پیل شو.
په یادو مراسمو کې د اړوندو ولایتونو پوهنې رئیسانو، مسئولینو، د ولسوالیو پوهنې آمرینو، علماءکرامو، د مدارسو او ښوونځیو یو شمېر استاذانو، طلابو او زده کوونکو حضور درلود.
په پیل کې د پوهنې رئیسانو ټولو ګډون والو او مېلمنو ته ښه راغلاست ووایه او د افغانستان.ا.ا. د پوهنې وزارت د سرپرست الحاج مولوي حبیب الله آغا ځانګړی پیغام یې ګډون والو ته ولوست.
همدارنګه د پوهنې مسئولینو د افغانستان علم پرور ملت، استاذانو او زده کوونکو ته د مبارکۍ ترڅنګ، د ښوونیز نظام د لاپرمختګ او پراختیا په اړه د نوي ښوونیز کال لپاره د خپلو کړنلارو او پلانونو څخه خبر ورکړ، له علماءکرامو او خلکو څخه یې وغوښتل تر څو د نوي نسل د ښوونې او روزنې په برخه کې ورسره مادي او معنوي همکاري وکړي.
دغه راز هغوی له خلکو هیله وکړه، چې خپل اولادونه د علم او پوهې حاصلولو په موخه مدارسو او ښوونځیو ته واستوي، ترڅو په راتلونکي کې د افغان مسلمان ملت لپاره د خدمت مصدر وګرځي.
علماءکرامو او نورو ګډون والو هم د اسلام مبارک دین له نظره د علم او پوهې د اهمیت په تړاو خبرې وکړې، له طلابو او زده کوونکو یې وغوښتل چې د زده کړو ترلاسه کولو په لاره کې هلې ځلې وکړي.
یاد مراسم د ښوونځي د زنګ په وهلو او دعائیې په لوستلو سره پای ته ورسېدل.
