د پوهنې او مخابراتو وزیرانو د ښوونځيو ارتباطي پروګرامونو ګړندۍ پلي کولو په اړه خبرې وکړې

پوهنې وزارت- کابل: د پوهنې وزیر ډاکترمحمد میرویس بلخي او مخابراتو او ټکنالوژۍ وزیر محمد فهیم هاشمي له یو بل سره ولیدل، د انټرنیټ او IT Lab پروګرامونو پواسطه د ښوونځيو د ارتباط په اړه یې په ګړندۍ پلي کولو خبرې وکړې.
دا لیدنه چې پوهنې وزارت کې ترسره شوه، د مخابراتو تنظیماتي ادارې (اترا) استازو هم ګډون درلود.
د پوهنې وزیر ډاکټر بلخي په داسې حال کې چې د ښوونځي ارتباطي پروګرام پیاوړې اوکمزورې نقطې په ګوته کړې، هغه د مخابراتو وزارت او اترا څخه د لا همکارۍ غوښتنه وکړه ترڅو دا پروګرام د ټول هیواد په ښوونځیو کې پلي کړي.
د مخابراتو او ټکنالوژي وزیر محمد فهیم هاشمي ژمنه وکړه، ترڅو د پوهنې وزارت او اترا ادارې سره په ګډه همکاري، ډیر زر د ارتباطي سیستم په مخ کې پراته خنډونه لرې او ښوونځي د انټرنیټ IT Labپواسطه ونښلوي.
د یادونې وړده چې د ښوونځیو د نښلولو څخه موخه، د تجهیزاتو او ټیکنالوژۍ کارول، د زده کړې خدماتو ته وده ورکول او ملي او نړیوالو ښوونځیو ترمنځ د ښوونې او روزنې ارتباطي اړیکو پیاوړي کولو ته وده ورکول دي.