د پوهنې وزارت د دعوت او ارشاد ریاست اوونیز راپور
د پوهنې وزارت د دعوت او ارشاد ریاست د خپلو دیني، روزنيزو او څارنيزو فعاليتونو د پیاوړتیا په موخه د تېرې اوونۍ په ترڅ کې بېلابېلې مهمې کړنې ترسره کړې، چې مهم موارد یې په لاندې ډول دي:
د دعوت او ارشاد ریاست د څارنيزو ټیمونو له لوري د کابل ښار اړوندو ۲۵ بابه خصوصي او ۲ بابه امارتي ښوونځيو درسي بهير وڅارل شو.
د څارنې او ارزونې پر مهال د تعلیمي نصاب د تطبیق، د سیرت او صورت، نظم او ډسپلین، اخلاقي وضعیت او د ښوونیز چاپېریال اړوند بېلابېل موارد و ارزول شول. همداراز د چارو لا ښه والي او د احتمالي نیمګړتیاوو رفع کولو لپاره اړینې سپارښتنې او لارښوونې هم وړاندې شوې.
په ورته مهال د پوهنې وزارت د تېرې اوونۍ په ترڅ کې د دعوت او ارشاد ریاست مسوولينو او د کابل ښار اړوندو تعليمي حوزو د آمرينو ترمنځ ناسته ترسره شوه، کوم چې اساسي موخه يې د تعليمي ادارو ترمنځ د همغږۍ او همکاريو پياوړتيا وه٠
دغه راز د هېواد په کچه د ولایتونو د دعوت او ارشاد ادارو، د ولسوالیو پوهنې امریتونو، امارتي او خصوصي ښوونځیو، مدارسو او خصوصي ښوونیزو مرکزونو کې د دعوت او ارشاد د نصاب تدریسي بهیر په منظم ډول روان دی.
دغه نصاب د اسلامي او اخلاقي ارزښتونو د پیاوړتیا، د ښوونیز چاپېریال د اصلاح او د زدهکوونکو، ښوونکو او اداري کارکوونکو د فکري او اخلاقي روزنې په موخه تدریسېږي٠
ياد تدریس بهیر په دوامداره توګه تر څارنې لاندې دی او د کیفیت د لوړولو لپاره لازمې سپارښتنې او لارښوونې ورکول کېږي.
د دعوت او ارشاد ریاست د روانو فعالیتونو موخه په ښوونیز نظام کې د اسلامي او اخلاقي ارزښتونو پیاوړتیا، د اداري او تعلیمي چارو ښه تنظیم او د سالم، منظم او اغېزمن ښوونیز چاپېریال رامنځته کول دي. دغه ریاست ژمن دی چې د خپلو دیني، تربیوي او څارنيزو مسوولیتونو لا ښه ترسره کولو لپاره خپلو هڅو ته دوام ورکړي.
