د پوهنې وزارت د ودانیو او ملکيتونو د ساتنې او مراقبت نوی رئیس معرفي او رسماً یې په کار پیل وکړ
د پوهنې وزارت د سرچینو او ادارې د معین الحاج مولوي صبغت الله وصیل له لوري، د یاد وزارت د ودانیو او ملکیتونو د ساتنې او مراقبت نوی رئیس مولوي سمیع الحق حماس رسماً کارکوونکو او منسوبینو ته ور وپېژندل شو.
د پوهنې وزارت د سرچینو او ادارې معین د دغه وزارت د ودانیو او ملکیتونو د ساتنې او مراقبت د نوي رئیس د پېژندګلوۍ پرمهال، د اداري کادرونو بدلون او ګمارنه له ادارې اصولو څخه وګڼله او نوي رئیس ته یې د مبارکۍ ویلو ترڅنګ وویل، چې خپلې ورسپارل شوې دندې په پوره صداقت او اخلاص ترسره کړي.
ورپسې د ساتنې او مراقبت نوي رئیس مولوي سمیع الحق حماس هم د پوهنې وزارت د مشرتابه له باور څخه د قدرداني ترڅنګ ژمنه وکړه، چې په ټول توان او د خپلې کاري تجربې څخه په استفادې سره به د پوهنې وزارت ټولې لارښوونې او پروګرامونه پلي کړي.
