د پوهنې وزارت سرپرست د فاریاب ولایت له پوهنې مسئولینو، علماءکرامو او بانفوذه شخصیتونو سره وکتل
د پوهنې وزارت سرپرست الحاج مولوي حبیب الله آغا، چې د فاریاب ولایت د تعلیمي وضعیت ارزونې، تعلیمي پروژو پرانیستلو او ځینو رسمي چارو ترسره کولو په موخه یې یاد ولایت ته سفر کړی، نن یې د همدغه ولایت د کنفرانسونو په تالار کې د پوهنې مسئولینو، علماءکرامو، بانفوذه شخصیتونو او د سیمه ییزو ادارو له چارواکو سره د یوې لویې غونډې پر مهال، د هېواد د پوهنیز نظام د کمي، کیفي او متوازن پرمختګ لاښه والي لپاره د پوهنې وزارت د پلانونو او پروګرامونو په اړه تفصیلي خبرې وکړې.
نوموړي ټینګار وکړ چې د دیني علومو سربېره، د عصري علومو زده کړه هم زموږ د ټولنې یو له مهمو اړتیاوو څخه ده؛ نو د یاد وزارت یو له مهمو لومړیتوبونو څخه په هېواد کې د مدارسو او ښوونځيو په ګډون د ټولو تعلیمي مرکزونو ترمنځ د بشپړ یووالي فضاء رامنځته کول دي.
نوموړي د ټولنې په اصلاح کې د علماءکرامو رول ته په اشارې سره څرګنده کړه: "لله الحمد؛ علماءکرام په اسلامي نظام کې کلیدي نقش لري او په علماءکرامو، چارواکو او ښوونکو غږ کوم، چې د علم او پوهې د کمي او کیفي کچې لا لوړولو او پرمختګ لپاره خپلې هڅې لاپسې زیاتې کړي.
د غونډې په دوام، د فاریاب ولایت یو شمېر چارواکو، علماءکرامو او علمي شخصیتونو په خپلو ویناوو کې، یاد ولایت ته د پوهنې وزارت د سرپرست له سفر تود هرکلی وکړ او د همدغه وزارت د مشرتابه له هغو هڅو څخه یې مننه وکړه، کوم چې په یاد ولایت کې یې د مدارسو او ښوونځیو د پراختیا او د دوی د ماشومانو لپاره د ډېرو تعلیمي آسانتیاوو برابرولو په برخه کې یې کړې دي.
