د پوهنې وزارت لخوا د ښوونکو د روزنې او مسلکي پراختیا علمي غړو بستونو لپاره ازموینه واخیستل شوه
د پوهنې وزارت له لوري د ښوونکو د روزنې او مسلکي پراختیا علمي غړو د ۷۱۸ کادري بستونو ډکولو لپاره ډله ییزه رقابتي ازموینه، د کیفیت تضمین معین محترم الحاج مولوي عبدالخالق صادق، ځینو مرکزي رئیسانو، مسئولینو او د ازموینې ګډې کمېټې په حضور کې واخیستل شوه.
د ازموینې په پرانیست غونډه کې د پوهنې وزارت د کیفیت تضمین محترم معین الحاج مولوي عبدالخالق صادق د خپلو خبرو پرمهال، د هېواد د نوي نسل په ښوونه او روزنه کې د مسئولیتونو په اداء کولو، پوره اخلاص، هلوځلو او ذهنیت جوړولو ټینګار وکړ او له علمي غړو څخه یې وغوښتل چې د پوهنیز کیفیت په پیاوړتیا کې هر ډول هڅې ونه سپموي.
ورپسې د نصاب او د ښوونکو د روزنې او مسلکي پراختیا لوی رئیس محترم الحاج مولوي اول ګل ایوبي څرګنده کړه چې له ازموینې یې بنسټیزه موخه د مسلکي کادرونو جذبول او د ښوونځیو په کچه د ښوونیز او روزنیز کیفیت لوړول دي.
په ورته مهال د ښوونکو د روزنې او مسلکي پراختیا رئیس محترم مولوي محمدابراهیم عمري وویل: "دغه ازموینه د پوهنې وزارت د رهبرۍ په ځانګړې لارښوونه د کارکوونکو چارو، د نصاب او ښوونکو مسلکي پراختیا لوی ریاستونو او د ښوونکي مسلکي پراختیا ریاست د مشترکې کمېټې له لوري په بشپړې روڼتیا ترسره شوه، چې د درېیو ورځو په جریان کې به یې پایلې په پوره شفافیت سره اعلان او وړ کسان به یادو بستونو ته وروپېژندل شي."
دغه راز نوموړي زیاته کړه چې د ښوونکو مسلکي پراختیا بستونو ته شاوخوا ۳۰۰۰کسانو نوملیکنه کړې وه، چې له ډلې یې۱۴۰۰ تنه د ذکرشوې ازموینې لپاره د شرایطو وړ وبلل شول او په پایله کې به یې ۷۱۸ تنه د مرکز او ولایتونو کادري بستونو ته ورمعرفي شي.
