د پوهنې وزارت لسمه اداري غونډه ترسره شوه
د پوهنې وزارت د مرکزي رئیسانو لسمه اداري غونډه د یاد وزارت د ښوونې او روزنې د معین الحاج مولوي سخاء الله سعید په مشري ترسره شوه.
غونډه د قرآن عظیم الشان د څو مبارکو آیاتونو په تلاوت سره پیل شوه او بیا له آجنډا سره سم پر موضوعاتو بحث پیل شو.
پرېکړه وشوه چې د پوهنې وزارت د راتلونکي کال د تشکیل لپاره دې هر مرکزي ریاست خپله طرحه د سرچینو او ادارې د معین په مشرۍ له جوړ شوي کمېسیون سره شریکه کړي، ترڅو له بحث، غور او څېړنې وروسته د راتلونکي کال تشکیل د همدې طرحې پر بنسټ جوړ شي.
همدا راز پرېکړه وشوه چې د پوهنې وزارت د بیلابیلو مرکزي ریاستونو د اړوندو کارکوونکو د کدري معاشاتو د اجراء غوښتنه دې د ریاست الوزراء مقام ته وړاندېز شي.
په غونډه کې د پوهنې وزارت ټولو مرکزي ریاستونو ته دنده وسپارل شوه ترڅو د يوې اونۍ په موده کې خپل اړوند تدارکاتي او مصارفاتي پلانونه او د بودیجې طرحه د سرچینو او ادارې معینیت ته ولېږي.
همدا راز د ځينو نورو مسایلو په اړه هم بحثونه او پرېکړې تر سره شوې.
غونډه د دعائیې په لوستلو سره پای ته ورسیده.
