د پوهنې وزارت کې د اداري پروسو د ساده کولو په اړه د عامه پوهاوي غونډه ترسره شوه
یاده غونډه چې د پوهنې وزارت او د اداري اصلاحاتو او ملکي خدماتو د ادارې تر ګډ اشراف لاندې د یاد وزارت د غونډو په تالار کې جوړه شوې وه، پکې د پوهنې وزارت معینانو، مرکزي رئیسانو، آمرینو، مدیرانو،کارمندانو او د اداري اصلاحاتو او ملکي خدماتو د ادارې رئیس، مسئولینو او کارمندانو برخه درلوده.
غونډه د قرآن عظیم الشان د څومبارکو ایاتونو په تلاوت سره پیل شوه، وروسته د یاد وزارت د سرچینو او ادارې معین شیخ مولوي سعیداحمد شهیدخیل وینا وکړه او په خپله وینا کې یې د اداري پروسو د ساده کولو او شفافیت د اهمیت او ارزښت په اړه تفصیلې خبرې وکړې. ورپسې د اداري اصلاحاتو او ملکي خدماتو د ادارې رئیس مولوي عبدالحنان عارف الله او دپوهنې وزارت د تضمین کیفیت معینیت سرپرست الحاج مولوي عبدالخالق صادق هم د موضوع په اړه ارزښتناکې ویناوې وکړې.
تر ویناوو وروسته د اداري اصلاحاتو د ادارې د اداري پروسو د تحلیل اوتعقیب آمر د پروجکتور په وسیله د اداري پروسو د ساده کولو د مفهوم، اهمیت او اصولو په اړه د غونډې حاضرینو ته تفصیلي پریزینټیشن ورکړ.
غونډه د پوهنې وزارت د ښوونې او روزنې د معین الحاج مولوي سخاءالله سعید له لوري د دعائیې په لوستلو سره پای ته ورسیده.
