د ځینو رسنیو د بې بنسټه راپورونو په تړاو د پوهنې وزارت اعلامیه!
په دې وروستیو کې ځینو وګړو او رسنیو په خپلو غیر حقیقي راپورونو کې ادعا کړې وه، چې د پوهنې وزارت له لوري په هېواد کې د ښځینه وو ۴۷ بابه هغو ښوونځیو ته تر شپږم ټولګي پورته د فعالیت اجازه ورکړل شوی، کوم چې د یاد وزارت معیارونه یې پوره کړي دي.
د پوهنې وزارت دغه ډول راپورونه غیر واقعي او له حقیقت څخه لرې ګڼي.
همدارنګه پوهنې وزارت مشرتابه یو ځل بیا د هېواد له ټولو رسنیو غوښتنه کوي، چې د ژورنالیزم د منل شویو اصولو او بنسټونو او د افغاني ټولنې د حقایقو پر بنسټ خپل خبرونه او راپورونه چمتو او خپاره کړي، تر څو له یوې خوا د ژورنالیزم وقار او اعتبار ته زیان ونه رسېږي او له بلې خوا اړوندې رسنۍ د ټولنې د حقایقو په څرګندولو سره د خلکو د ذهنیت په روښانولو کې رغنده ونډه واخلي.
د پوهنې وزارت مشرتابه په دې باور لري، چې د ناسمو افواهاتو او بې بنسټه راپورونو د خپرولو پر ځای غوره ده، چې لاسونه سره یو کړو او د یو متحد او جنګ ځپلي افغانستان د بیارغونې، سوکالۍ او پرمختګ په برخه کې په رښتیني توګه ګامونه پورته کړو.
